Baraza la Wafanyakazi Sekretarieti ya Mkoa wa Kagera limezinduliwa rasmi tarehe 27/05/2011na Mhe. Mohammed A. Babu katika ukumbi wa Mkuu wa Mkoa Kagera. Katika uzinduzi huo Mhe. Mkuu wa Mkoa wa Kagera alitoa nasaha zake kwa Baraza hilo lenye wajumbe wapya na zifuatazo ni nasaha zake alizozitoa katika hotuba yake;

Nawapongeza sana kwa kufanya uchaguzi uliofanyika tarehe 22 – 26 Machi 2010 ambapo wajumbe wapya 62 walichaguliwa kulingana na mkataba mpya wa Baraza la Wafanyakazi Mkoa wa Kagera.

Idadi hii ya wajumbe inafanya maeneo yote ya Sekretarieti kuwa na wawakilishi kwenye Baraza hili.

Kwa hiyo, kwa namna ya pekee napenda kuchukua fursa hii kuwapongeza wajumbe wote kwa kuchaguliwa kwenu kuwa viongozi na wajumbe wa Baraza hili. Kuchaguliwa kwenu kunatokana na uwezo mlionao katika kutekeleza majukumu yenu kama wajumbe wa Baraza hili muhimu. Aidha ni matumaini yangu kuwa mtatumia dhamana hiyo kuimarisha mahusiano baina ya mwajiri na watumishi wenzenu wa Sekretarieti ya Mkoa wa Kagera. Mahusiano baina ya mwajiri wenu na watumishi wenzenu yanategemea jinsi mtakavyotekeleza wajibu wenu kama ilivyoainishwa kwenye sheria.

Kwa kupitia Sheria ya Majadiliano ya Pamoja katika Utumishi wa Umma (Public Service Negotiating Machinery Act) Na. 19 ya mwaka 2003, Serikali imeweka utaratibu mzuri wa kuwashirikisha watumishi wa Umma katika hatua mbalimbali za kutoa maamuzi yanayowahusu na maendeleo ya sekta ya umma kwa ujumla.

Lengo la Sheria hii ni pamoja na kuwezesha kuundwa kwa Mabaraza ya Wafanyakazi mahali pa kazi yaani katika kila Wizara, Idara za Serikali Zinazojitegemea, Ofisi za Wakuu wa Mikoa, Serikali za Mitaa na Wakala za Serikali. Nafurahi kusikia kuwa zoezi la uundaji wa Mabaraza ya Wafanyakazi katika mkoa wetu linatekelezwa vizuri. Kama zipo sehemu ambazo hazijaunda Mabaraza yao, hatua za makusudi zichukuliwe kwani kutofanya hivyo ni uvunjwaji wa sheria.

Uzoefu umeonyesha kuwa pale mabaraza haya yanapotumika vizuri yanasaidia sana kuleta maelewano mahali pa kazi. Kupitia mabaraza haya migomo ya wafanyakazi isiyo ya lazima imeweza kuepukwa na migogoro mingi imeshughulikiwa kwa njia ya majadiliano. Ni muhimu tukaendeleza utamaduni huu kama njia ya ustaarabu ya kudai maslahi badala ya migomo. Serikali kwa upande wake imeendelea kuwahakikishia kuwa itaendelea kuwahimiza waajiri kutoa fursa ya kujadiliana na wafanyakazi wake.

Kwa kupitia kikao hiki nawahimiza waajiri wote mkoani Kagera kuhakikisha kuwa madai mbalimbali ya watumishi yanashughulikiwa ipasavyo kwa kufuata sheria, kanuni na taratibu zilizopo, ikiwa ni pamoja na kuhakikisha kwamba mabaraza haya yanafanya vikao vyake inavyotakiwa kisheria.

Pamoja na umuhimu wa kumjali mtumishi, msisitizo uliopo hivi sasa serikalini na mahali pengine pa kazi ni pamoja na umuhimu wa watumishi hao kuongeza tija. Ikumbukwe kwamba bila watumishi kujituma zaidi na kuwa wabunifu ili kungeza tija, Serikali haiwezi kupata mapato ambayo yataiwezesha kuboresha maslahi ya Watumishi. Uboreshaji wa utumishi wa umma unaoendelea unasisitiza watumishi kuondokana na tabia ya kufanya kazi kwa mazoea na badala yake wafanye kazi kimkakati kwa kujali matokeo ya kazi. Lengo likiwa ni kutoa huduma bora na kuimarisha uwajibikaji wa serikali kwa umma.

Baraza la Wafanyakazi ni chombo muhimu sana katika kuleta tija mahali pa kazi. Nitafurahi iwapo mikakati ya kuongeza tija na kupunguza gharama za uendeshaji wa Sekretarieti itakuwa ni agenda ya kudumu katika mikutano ya Baraza hili.

Kwa mujibu wa Sheria ya Majadiliano ya Pamoja katika Utumishi wa Umma (Public Service Negotiating Machinery Act) Na. 19 ya mwaka 2003, Baraza hili la Wafanyakazi lina majukumu makuu yafuatayo:-